ആറന്മുള വിമാനത്താവളം : കോഴിത്തോട് ഇനിയെങ്ങോട്ട് ?

     "കെ ജി എസ് എയറോപോളിസി"ന്റെ ആദ്യ പടിയായ എയർപോർട്ട് വരുന്നതോടുകൂടി നശിക്കപ്പെടുന്ന, പമ്പയാറിന്റെ ഒരു ജലശ്രോദസ്സായ കോഴിത്തോടിനെ പിന്തുടർന്ന് ഞാൻ മനസ്സിലാക്കിയ കാര്യങ്ങളാണ്  ഇവിടെ വിവരിക്കുന്നത്. ഇതിലൂടെ കോഴിത്തോട് എന്ന ജലശ്രോദസ്സിന്റെ ഇന്നത്തെ  അവസ്ഥയും പ്രാധാന്യവും മനസ്സിലാക്കിത്തരുക എന്നതാണ് ഉദ്ദേശിക്കുന്നത്.

 

     വാരിയാപുരം,ഇലന്തൂർ എന്നീ പ്രദേശങ്ങളിലൂടെ സഞ്ചരിച്ചു കരിമാരത്തുമലയുടെ അടുത്തെത്തുമ്പോഴാണ് കോഴിത്തോടിനെ വിഴുങ്ങുവാൻ തയ്യാറായി വിമാനത്താവളം ഒരുങ്ങുന്നത്. 

      ആറന്മുള പുഞ്ചയും മല്ലപ്പുഴശ്ശേരി പുഞ്ചയും ചേരുന്ന പാടശേഖരത്തിലാണ് പദ്ധതി ഉദ്ദേശിക്കുന്നത്. ഈ രണ്ടു പുഞ്ചയുടേയും ഇടയിലൂടെ ഒഴുകിയിരുന്ന നീർച്ചാൽ മണ്ണിട്ട്‌ നികത്തിയാണ് എബ്രഹാം കലമണ്ണിൽ ആദ്യ എയർസ്ട്രിപ് നിർമാണത്തിന് തയ്യാറെടുത്തത്.പിന്നീട് ഇതിൽ നിന്നുമയാൾ പിന്മാറിയെങ്കിലും അപ്പോഴേക്കും നീർച്ചാൽ അന്ത്യശ്വാസം വലിച്ചുകഴിഞ്ഞിരുന്നു. കോഴിത്തോടിൽ നിന്നും ഉത്ഭവിച്ചിരുന്ന ഈ നീർച്ചാലിലെ ജലമുപയോഗിച്ചായിരുന്നു കുറച്ചു വർഷങ്ങൾക്ക് മുൻപുവരെ ഇവിടെ കൃഷി നടത്തിയിരുന്നത്. നിലവിൽ നിരവധിയാളുകൾ കുടിൽ കെട്ടി സമരം നടത്തുന്നതും ഈ നികത്തിയ നിലത്തിലാണ്.

തോടിന്റെ നികത്തിയ ഭാഗം

കരിമാരത്തു വന്നുചേരുന്ന കോഴിത്തോട്

നികത്തിയ നിലത്തിലെ കുടിൽ കെട്ടി സമരം

നികത്തിയ ചാൽ

പൂർണമായ നികത്തലിൽ നിന്നും താല്ക്കാലികമായി കോഴിത്തോട്  രക്ഷപെട്ടെങ്കിലും, വിമാനത്താവളം നടപ്പിലാകുന്നതോടെ കരിമാരത്തു വെച്ച് ഈ തോട് അവസാനിക്കും. 
                                                                                                                                                                  

      കരിമാരത്തു വെച്ച് ഈ തോട് മൂടപ്പെട്ടാൽ ഒരു നഷ്ട്ടം എന്നുപറയുവാൻ പാകത്തിന് എന്തെങ്കിലുമുണ്ടോ എന്നതറിയുകയാണ് എന്റെ അടുത്ത ലക്‌ഷ്യം.അതിനായി കരിമാരം മുതൽ പമ്പയാർ വരെയുള്ള കോഴിത്തോടിന്റെ പുരോഗതി കാണുവാൻ ഞാൻ പുറപ്പെട്ടു.
     കരിമാരത്ത് വീതി കുറഞ്ഞെങ്കിലും അടുത്ത കടവായ പള്ളിമുക്കം ഭാഗത്തെ
 ഇടക്കടവിൽ എത്തുമ്പോൾ നല്ല വീതിയിലാണ് കോഴിത്തോട് ഒഴുകുന്നത്‌.

 

ഇടക്കടവിലെ കോഴിത്തോട്

                                                                                                                                                                   

             2003 ൽ  ഉദ്ഘാടനം നടത്തിയ നാൽക്കാലിക്കൽ വലിയപാലത്തിൽ നിന്നാൽ ഇടക്കടവിനു ശേഷമുള്ള തോടിന്റെ അവസ്ഥയും പാഴ്ഭൂമിയായി കിടക്കുന്ന പാടങ്ങളും കാണുവാൻ കഴിയും. പന്തളത്തിലേക്കുള്ള വഴിയായ ഈ പാലത്തിന്റെ പണിയോടനുബന്ധിച്ചു നടത്തിയ മണ്ണിടീൽ പാടങ്ങളിൽ വെള്ളം കയറുന്ന അവസ്ഥയിൽ കൊണ്ടെത്തിച്ചു.

ഇടക്കടവിൽ നിന്നും ഒഴുകിയെത്തുന്ന  കോഴിത്തോട്

മണ്ണിട്ട്‌ വീതി കുറഞ്ഞ ഭാഗം

പാലം കടന്നുള്ള തോടിന്റെ  യാത്ര

                                                                                                                                                                

തുടർന്ന് തുരുത്തിമലയിലെത്തുകയും ഒഴൂർകടവ് പാലത്തിനടിയിലൂടെ പമ്പയാർ ലക്ഷ്യമിട്ട് നീങ്ങുകയും ചെയ്യുന്നു.
 

ഒഴൂർ കടവ് പാലം

തുരുത്തിമലയിലൂടെ കോഴിതോട്

                                                                                                                                                       

അവസാനമായി ഞാൻ ചെന്നെത്തുന്നത്  പ്രധാന റോഡിലുള്ള "കോഴിപ്പാലം" എന്ന കോവിൽപാലത്തിലാണ്. തോടിന്റെ രണ്ടു വശങ്ങളിൽ നിന്നും മണ്ണിട്ട്‌ വീതി കുറഞ്ഞ അവസ്ഥയാണ് ഇവിടേയും കാണുവാൻ കഴിഞ്ഞത്. കോഴിത്തോട് പമ്പയാറുമായി ചേരുന്നത് ഇതിന്റെ അടുത്താണ്.

പമ്പയോട് കോഴിതോട് വന്നുചേരുന്ന സ്ഥലം

     ആറന്മുള ഗ്രാമത്തിന്റെയും പമ്പയാറിന്റെയും ഒരു പ്രധാന  ജലസ്രോദസ്സാണ് അതിജീവിക്കുവാൻ പാടുപെട്ടുകൊണ്ടിരിക്കുന്ന ഈ ജലാശയം. എയർപോർട്ട് വരുന്നത് തീർച്ചയായും ഇതിനൊരു ഭീഷണിയാണ്.

         ആറന്മുളയിലെ പ്രശ്നങ്ങൾക്ക് ആത്യന്തികമായ കാരണം നെൽകൃഷിയുടെ നാശമാണ്. കൃഷി നിലക്കുകയും പാഴ്ഭൂമിയായി കൃഷിയിടങ്ങൾ കിടക്കുകയും ചെയ്യ്തതാണ് വ്യവസായികളെ ആകർഷിക്കുന്നതിനും ഭൂമി ഉടമകൾ അതു വില്ക്കുവാൻ നിർബന്ധിതരായിമാറിയതിനും കാരണം. നെൽകൃഷി നടത്തിയാണ് ഇവിടെ സമരം ചെയ്യേണ്ടത്. അപ്പോൾ മാത്രമേ യഥാർത്ഥത്തിലുള്ള വികസനം ആറന്മുളയിലുണ്ടാവുകയുള്ളൂ. എങ്കിൽ മാത്രമേ ആ പൈതൃക ഗ്രാമത്തെ വീണ്ടും അതിന്റെ പ്രൗഢിയിൽ എത്തിക്കാനാവുകയുള്ളൂ.

       ആറന്മുളയിൽ വിമാനം പറപ്പിക്കുവാൻ ധ്രിതി കാട്ടുന്ന സർക്കാർ മറിച്ച് നെല്കൃഷിയെ പുനരാര്‍ജ്ജിപ്പിക്കുവാനും പ്രോത്സാഹിപ്പിക്കുവാനുമുള്ള നടപടികൾക്കാണ് ധ്രിതി കാട്ടേണ്ടത്‌.

- ഹരി