വെടിവഴിപാട് - " എല്ലാവരും കണ്ടിരിക്കേണ്ട ഒരു A പടം "

ഇക്കഴിഞ്ഞ ചലച്ചിത്ര മേളയിലെ സിനിമകളിൽ വിരളമായി മാത്രം കണ്ട , ഒരു സാമൂഹികപുനർവിചിന്തനം നൽകുന്ന വിഷയമാണ് വെടിവഴിപാട് പറയുന്നത്. "ബ്ലാക്ക്‌ ഫോറസ്റ്റ്" പോലെയുള്ള നിലവാരം കുറഞ്ഞ സിനിമകൾ പ്രദര്ശിപ്പിച്ച മേളയിൽ  ഈ ചിത്രം വന്നില്ല എന്നത് വളരെ പരിതാപകരമായ ഒരു കാര്യമാണ്.

     "സദാചാരവാദികൾ പൊറുക്കുക" എന്ന പരസ്യവാചകത്തിൽ സൂചിപ്പിക്കുന്നതുപോലെതന്നെ സമൂഹത്തിലെ കപട സദാചാരങ്ങളെ തുറന്നുകാണിക്കുകയാണ് ശംഭു പുരുഷോത്തമൻ എന്ന നവ-സംവിധായകൻ.
കുടുംബവുമായി തിയറ്ററിലിരുന്നു കാണുവാൻ സാധിക്കാത്ത നിരവധി രംഗങ്ങൾ ഉണ്ടെങ്കിലും ആത്യന്തികമായി എല്ലാവരും ചിന്തിക്കേണ്ട ഒരു വിഷയമാണ് ചിത്രം ചൂണ്ടിക്കാട്ടുന്നത്. പൊങ്കാല എന്ന പ്രശസ്ത്തമായ അനുഷ്ഠാനത്തെ പശ്ചാത്തലമാക്കി എന്നാൽ അതിനു യാതൊരു അപകീർത്തിയും നൽകുവാൻ ഇടയുണ്ടാക്കാതെയാണ് ചിത്രം കഥ പറയുന്നത്. കണ്ണകിക്കായി സമർപ്പിക്കുന്ന പൊങ്കാലയുടെ പുരാണപശ്ചാത്തലം പറഞ്ഞുകൊണ്ട് ആരംഭിക്കുന്ന ചിത്രത്തിലുടനീളം പ്രബലരായ സ്ത്രീകഥാപാത്രങ്ങളെ കാണുവാൻ സാധിക്കും.
     അശ്ലീല ചിത്രങ്ങൾ മാത്രം പ്രദർശിപ്പിക്കുന്ന  തിയറ്റർ പൊങ്കാലയുടെ ദിവസങ്ങളിൽ "കുമാരസംഭവം" പ്രദർശിപ്പിക്കുന്നു  സാമുഹികവിരുദ്ധർ ഉത്സവസേവാ രംഗത്തേക്ക് വരുന്നു  താല്പ്പര്യമില്ലാത്ത യുവതി അമ്മായിയമ്മയുടെ നിർബന്ധത്തിനുവഴങ്ങി പൊങ്കാലയിടുവാൻ പോകുന്നു മുതലായ എല്ലാ സൂചനകളും സമൂഹത്തിലെ കപടസദാചാരത്തെ വിളിച്ചോതുന്നു. ചൊവ്വാ ദോഷം എന്ന വിശ്വാസം മൂലം വിവാഹിതരാവേണ്ടിവന്ന, എന്നാൽ ജീവിതത്തിൽ ഒരു ചേർച്ചയും ഉണ്ടാവാത്ത ദംബതികളിലൂടെ അന്ധവിശ്വാസങ്ങളേയും ചിത്രം ചോദ്യം ചെയ്യുന്നു.

       ആദ്യപകുതിയിൽ അശ്ലീലം നിറഞ്ഞ ഒരു എന്റർറ്റൈനർ മാത്രമാണ് എന്ന് തോന്നിച്ചെങ്കിലും  രണ്ടാം പകുതിയോടെ കൂടുതൽ സാമുഹികചിന്തകളും ചോദ്യങ്ങളുംകൊണ്ട് നിറഞ്ഞ ഒരു മികച്ച ചിത്രമായി മാറി "വെടിവഴിപാട്"